Сигурен старт во Купот – МЗТ ја продолжува доминацијата против Работнички
Кошаркарите на МЗТ Скопје со убедлива победа го започнаа настапот на завршниот турнир од Куп на Македонија, забележувајќи шеста последователна победа во меѓусебните дуели со вечниот ривал, Работнички (100-69). 💪💙
По кратка почетна неизвесност, МЗТ стигна до водство со серија од девет поени, а потоа со нова серија од 17-5 ја зголеми предноста на двоцифрена (42-29), што веќе наговести дека победникот ќе биде јасен уште во првото полувреме.
Најефикасен беше Мек Смит со 17 поени и 6 асистенции, додека Илајџа Мекејден забележа 14 поени и 7 скока. Крстевски и Андреј Магдевски постигнаа по 11 поени, додека целиот тим покажа контрола и сигурност во играта.
Во полуфиналето, закажано за утре (сабота), МЗТ Скопје ќе се соочи со тимот на Кожув, натпревар кој ќе започне во 17:00 часот, исто така во Куманово.