Пораз на гостувањето кај ТФТ!
Екипата на МЗТ Скопје Аеродром не успеа да дојде до позитивен резултат во дерби дуелот против ТФТ, кој вечерва се одигра во СРЦ „Кале“ и заврши со минимална победа на противникот (74-70). Овој натпревар беше дел од 9. коло во Првата лига, а „металците“ го забележаа третиот пораз во сезоната.
Иако нашите момци покажаа борбен дух, особено во второто полувреме, силната зонска одбрана на ТФТ и проблемите со реализацијата, особено од линијата за три поени (6/30), се покажаа како клучни за исходот. Домаќинот рано го презеде водството со агресивна игра, што резултираше со предност од 24-16 по првата четвртина.
Во вториот период, избраниците на тренерот Васко Атанасов успеаја да ја намалат разликата, но сепак на одмор се замина со резултат 43-36 во корист на ТФТ. Во третата четвртина, ритамот на натпреварот остана непроменет, иако нашиот тим се обидуваше да се врати во игра.
Во последната четвртина, МЗТ Скопје се доближи на минус пет поени, но противникот умешно ги користеше своите шанси во клучните моменти. Најефикасен во редовите на МЗТ беше капитенот Војдан Стојановски со 13 поени, додека кај ТФТ се истакна Дарин Говенс со 24 поени, седум скока и пет асистенции. Дополнителен предизвик за нашите играчи беше и скок-играта, каде домаќинот имаше предност (43-34).