Ново првенство и веднаш нова глупост на Перо Антиќ и КФМ!

2020 30 Окт

Колку што со нетрпение го очекувавме стартот на новата сезона, која челниците на КФМ се смилуваа да ја почнат еден месец подоцна од предвиденото, толку бевме шокирани кога го добивме делегирањето за првата средба.

Веќе подолго време знаевме дека шампионатот ќе го почнеме на гости против Работнички, но ниту во сон не очекувавме дека тоа ќе треба да го направиме во „Градски парк“. Како и целата спортска јавност, бевме убедени дека овој спортски објект дефинитивно е пензиониран со оглед што не ги исполнува условите за одигрување средби од највисок ранг. Дури и читавме во медиумите изминативе месеци дека нашиот ривал ќе игра во СРЦ „Кале“.

Но, Перо Антиќ очигледно уште еднаш им излегол во пресрет на своите коалициски партнери и им дал дозвола да играат во салата, која не ги исполнува регулативите на ФИБА. Не се проблем само руинираните соблекувални, за чија страшна состојба се „слушна“ дури до Америка, немањето адекватни тоалети, туку елементарни работи поврзани со играта на паркетот.

Управниот одбор на КФМ на почетокот од октомври 2018 година донесе одлука да се забрани играњето во „Градски парк“ бидејќи комисијата за лиценцирање измерила дека „нема два метри простор од аут-линијата до првата следна пречка (записничката маса) и за такво нешто недостасуваат дури 65 сантиметри“, што е спротивно од прописите на ФИБА. Знаеме дека и по оваа одлука се правеа компромиси, па беа давани дозволи надвор од прописите во интерес на кошарката, но со ветувања дека тоа ќе биде последен пат. И веќе помисливме дека ќе нема нови п(р)опусти од Куќата на кошарката, но се измамивме.

Господа од КФМ, зарем не мислите дека е време да го пензионирате „Градски парк“, монтажен објект од времен карактер изграден пред 50 години, во кој ништо не е направено со децении и во кој условите се полоши од тие во третиот свет. Срамота е што дозволувате да се игра во сала, за која уште во 1979 година од легендарниот Лазар Лечиќ беше потенцирано дека „не одговара на реномето на кошарката во светот и на реномето на Работнички. Претесна е, не е комфорна и нема услови за адекватна работа“.

Колку што знаеме, летово комисија за лиценцирање ги посети сите прволигашки сали, зарем не беше и во „Градски парк“ да ги увиди пропустите евидентирани од своите претходници. Бараме јавно да биде објавен извештајот на оваа комисија, да видиме кој не си ја завршил работата и кој е виновник за враќањето на овој објект меѓу тие каде што ќе се игра елитна кошарка. Ако не ги добиеме одговорите, тогаш ние следното вечно дерби како домаќини ќе го играме во салата во ОУ „Ѓорѓија Пулевски“, каде што е потопло, со подобри соблекувални и сигурно подобри услови за играње од „Градски парк“

А, со ваквите ситни игри, Антиќ само си ги потврдува коалициските односи со своите пријатели, кои најдобро можеа да се видат кога заеднички, со сите сили, сторија сѐ за да му ја одземат титулата на МЗТ Скопје во минатиот шампионат, иако нашите тим беше првопласиран на табелата по игрите на теренот. Но, за жал, не бевме толку силни во дворските игри, во кои луѓето од КФМ и нивните партнери се покажаа повешти и поумешни.

И, на крајот, имаме важни прашања за Перо Антиќ и за неговите коалициски партнери. Што правиме ако в недела во периодот помеѓу 18 и 20 часот почне силно да врне, знаејќи ја пропустливоста на кровот во „Градски парк“? Ќе се селиме ли во друга сала, како што беше тоа случајот во март годинава, во последното коло пред прекинот поради пандемијата? Зарем не сметате дека тоа би било голем срам за македонската кошарка на почеток од третата деценија од 21 век?

И, зарем не би било тоа голем срам за вас како нејзин предводник и причина веднаш да си поднесете оставка?

4 Uni Banka.jpgNeuromedika za sajt.jpgaerodrom-novo-logo.jpg

За нас

 
МЗТ Скопје Аеродром е кошаркарски клуб од Општина Аеродром, Македонија. Клубот е основан во 1966 година и во својата историја има освоено шест титули во Македонската кошаркарска лига во рамките на Југославија (1970, 1971, 1972, 1973, 1974, 1979), седум по осамостојувањето на Македонија (2012, 2013, 2014, 2015, 2016, 2017, 2019) како и девет титули во Кошаркарскиот Kуп на Македонија (1996, 1997, 1999, 2000, 2012, 2013, 2014, 2016, 2018).
Покрај настапите во Македонската лига, „МЗТ Скопје Аеродром“ настапувал и во регионалната „АБА Јадранска лига“, како и во УЛЕБ Еврокупот.

Локација

Адреса: Булевар Јане Сандански бр.1, 1000, Скопје. Република Македонија

Контакт

тел/фах: +389 2 2444-567

email: Оваа е-адреса е заштитена од спамботови. Треба да ви е овозможено JavaScript за да ја видите.

 

Следете не и на

Top of Page