К.К. МЗТ Скопје Аеродром

Со пеколен напад и 13 тројки до значаен триумф на гости кај Динамик

2019 28 Nov

Добрата форма во која се наоѓаат во последно време, кошаркарите на МЗТ Скопје Аеродром ја потврдија со значајниот триумф на вечерашното гостување кај српски Динамик (92-82), со кој ја задржавме втората позиција на табелата во АБА2-лигата.

Домашниот тим нешто подобро го почна натпреварот, па уште по неколку воведни минути дојде до седум поени разлика (9-2 и 21-14). Тоа како да ги подразбуди нашите кошаркари, кои вратија со осум поени во низа и првата четвртина ја завршија со минимално водство (22-21). Изедначеноста на паркетот траеше сѐ до финишот од овој дел од играта, кога почна серијата тројки на нашите момци, кои благодарение на проектилите од далечина направија серија 20-4, по која дојдоа дури и до двоцифрена позитива (58-47).

Добрата форма на избраниците на тренерот Ѓорѓи Кочов и акумулираното искуство собрано од играње натпревари речиси секој трет ден дојде до израз во последните 15 минути, во кои умешно го одбиваа секој напад на противникот. Секогаш кога загустуваше доаѓаше некој прецизен шут за тројка, најчесто од вечерва расположените за шут Џабари Хиндс, Бојан Крстевски и Ерон Харис.

МЗТ Скопје Аеродром на средина од последната четвртина дојде до највисоките плус 13 (84-71), со кои ја најави значајната победа во борбата за самиот врз на табелата во АБА2-лигата и тоа против тим кој е во серија од четири триумфи по ред. „Металците“ и по деветтата рунда остануваат на втората позиција на табелата, со учинок 7-2, односно со една победа помалку за Борац Чачак, кој вечерва како гостин го совлада незгодниот Широки.

Хиндс одигра уште една фантастична средба, која ја заврши со дабл-дабл ефект од 22 поени (четири тројки) и 13 асистенции. Веднаш зад него беа Крстевски со 21 (3/5 за тројка) и Дамјан Стојановски со 19 поени, додека додека двоцифрен поентерски ефект имаше и Харис со 16 поени (3/3 за тројка).

Следен противник во регионалното натпреварување ни е тимот на Нови Пазар, кој ќе гостува во Скопје следната среда. Претходно, в недела, пред сино-белите кошаркари е уште едно тешко гостување од Првата лига и тоа кај сезонава одличниот Еуро Никел во Кавадарци.

4 Uni Banka.jpgGjorgievi logo2 mk za sajt.jpgNeuromedika za sajt.jpgaerodrom-novo-logo.jpgtriglav logo.jpg

За нас

 
МЗТ Скопје Аеродром е кошаркарски клуб од Општина Аеродром, Македонија. Клубот е основан во 1966 година и во својата историја има освоено шест титули во Македонската кошаркарска лига во рамките на Југославија (1970, 1971, 1972, 1973, 1974, 1979), седум по осамостојувањето на Македонија (2012, 2013, 2014, 2015, 2016, 2017, 2019) како и девет титули во Кошаркарскиот Kуп на Македонија (1996, 1997, 1999, 2000, 2012, 2013, 2014, 2016, 2018).
Покрај настапите во Македонската лига, „МЗТ Скопје Аеродром“ настапувал и во регионалната „АБА Јадранска лига“, како и во УЛЕБ Еврокупот.

Локација

Адреса: Булевар Јане Сандански бр.1, 1000, Скопје. Република Македонија

Контакт

тел/фах: +389 2 2444-567

email: This email address is being protected from spambots. You need JavaScript enabled to view it.

 

Следете не и на

Top of Page